+بعضی سازلار دوغولدوغو بؤلگهدن باشقا بؤلگهيه يول تاپديقدان سونرا، او بؤلگهنين لهجهسی، خصوصيتلری و فرهنگی ايله ائله اويوم يارادير کی، دئيهسن مين ايللردير اورادا چالينير.
۳۰-۱۲۰ ايل بوندان اؤنجه اروپانين گونئيينده(ايتاليا) دوزهلن آکاردئون، روسيا و شمال تورکلری(تاتار-باشقيرد و قیپچاق چؤلو تورکلری) طرفيندن منيمسهنيب، بعضی دگيشيکليکلره اوغراديقدان سونرا گارمون(قارمونGarmon) آدی ايله آذربايجان تورکلرينه يئتيشميشدير. ايندی ايش او يئره گليب چاتميشدير کی، گارمون ملی سازا چئوريلميش، گارمونسوز بير آذربايجان موسيقی ارکستری دوشونمک چوخ چتيندير.
بعضی سازلار ايسه آديندا و يا ظاهری قورولوشوندا دگيشيکليک باش وئرمهدن باشقا توپلوملارا گئچير؛ آمّا او توپلوم او سازلا اؤز ملی موسيقيسينی دوغرولداراق، او سازين چالينينش سبکينده و چوخ زامانلار کؤکونده دگيشيکليکلر ياراداراق او سازی اؤزونونکولشديرير.
فارس سنتی موسيقيسينده ويولن(فارس موغاملارينی ويولن ايله چالماق) ائله يئر آچميشدير کی آز قالا فارس کمانچاسی اونودولماغا باشلاميش؛ حتی بعضی تعصبلو فارس موسيقيچيلری(فارس تار و سهتارينين باغيرساقدان دوزلميش پردهلرينين اؤلوم قيمتينه ده اولسا يئنی پلاستيکلر ايله دگيشيلمهسينه اذن وئرمين اوستادلار دوشونجهسينه اوياراق) کمانچانی يئنه ديريلديب سئوديرمک اوميدی ايله فارس ويولنونو و فارس ويولن سبکينی تحريم ائتديلر(اؤزهلليکله انقلابدان سونرا).
تورک موسيقيسينده ايسه گيتار(الکترو-برقی گيتار) اؤزونه مخصوص يئری واردير. آذربايجان تورک موغاملاری، ماهنيلاری و بعضاً ساز هاوالارينی گيتارلا دوغرولدان بير چوخ صنعتکاريميز واردير. بونلارين آراسيندا هاميدان مشهور اولان صنعتچی رَميشRəmişدير(بيلديگيمه گؤره اصل آدی رافق حسينوفRafiq Hüseynov اولماليدير). رميشين مکتبينده و اونون گؤسترديگی يولدا بير چوخ شاگردلر بويا-باشا چاتيبلار. او جملهدن ايراندا گيتارچی بهبود آغاکيشیيفBehbud AğaKişiyev، پيانو و کيبورد اوستادی رضا رضوی ايله بيرليکده آذربايجان ملودیلری آدلی بير کاست چيخارميشلار. ايندی ايسه رميشدن پارچالار:
Ana Laylası
Oyun Havası
Gecələr
Popuri
Ay Işığında
Sarı Gəlin
+ ايران راديو تلويزيونو آرشيوينده آذربايجان تورک موسيقيسی. پارچالار قولاق آسماق اوچوندور. من کی دانلود ائليه بيلمميشم. دوستلاردان پارچالارين نئجه دانلود ائتمهسينين يولونو بيلن وارسا، لطفاً Comment بوراخسين...
